لماذا لم تذكر سورة البروج مصير الظالمين ؟

 لماذا لم تذكر سورة البروج مصير الظالمين ؟

..

بينما انا افكر في نهاية السنـ ـوار رحمه الله والصورة اللي انتشرت للشاب والناس اللي اتحرقت في فلـ سطين من ايام .

تذكرت ما قرأته وتأملت فيه سابقا عن سورة البروج .

لما جاء في السورة قصة استضعاف المؤمنين وتسلط جبار عليهم قام بحرقهم بالنار (ابقى اقرأ السورة ) فبتشوف او تتخيل صورة حدث مأساوي وبينتظر ذهنك بعد كدة تشوف ايه عاقبة الظالمين دول وهل ربنا نصر المؤمنين عليهم ؟ عشان حتى يزول من قلب الواحد الزعل اللي وصل له من بداية القصة بحشد المستضعفين والاستقواء عليهم ووضعهم في النار ..

..

لكن تلاقي ان ده محصلش

وان الايات بعد ذلك انتقلت الى موضوع تاني (هكذا تخيلت وهكذا يتخيل من يقرأ بسطحية ) ان السورة انتقلت الى موضوع جديد وهو الحديث عن مصائر الناس في الاخرة من جنة ونار ..

ولم يأتي فيها التكملة التي ينتظرها اي قارئ فيما حدث للظالم بعد ما حرق المؤمنين ... وهل ربنا نصر اللي عاش منهم .. او اهلك الظالم مثلا او ايه اللي حصل بعد كدة ؟

كل ده مجاش في السورة ..

كمان القصة دي لم تأتي في سورة اخرى فيكون فيها كمالة البيان..

ده كان فهمي وفهم اي شخص يقرأ بسرعة

لكن الحقيقة غير كدة خالص .. بالعكس دة السورة مكتملة جدا بس احنا اللي مش فاهمين المقصد منها ... اذ ان الانسان لو فهم المقصد العام من السورة هيفهم ليه في حاجات ذكرت وليه في حاجات لم تذكر .. وهيفهم علاقة اجزاء السورة مع بعضها..

مش هشرح السورة كلها ولو انها بديعة المعاني تجنبا للإطالة ..

لكن شوف الايتين اللي جاءو بعد القصة اللي احنا بنفهم انها انتقال لموضوع جديد وشوف اخر كلمة في الاية التانية (نهاية القصة ) هتفهم الفكرة ..

الاية الولى بعد القصة :

( إِنَّ الَّذِينَ فَتَنُوا الْمُؤْمِنِينَ وَالْمُؤْمِنَاتِ ثُمَّ لَمْ يَتُوبُوا فَلَهُمْ عَذَابُ جَهَنَّمَ وَلَهُمْ عَذَابُ الْحَرِيقِ)

الاية التانية بعد القصة :

(إِنَّ الَّذِينَ آمَنُوا وَعَمِلُوا الصَّالِحَاتِ لَهُمْ جَنَّاتٌ تَجْرِي مِن تَحْتِهَا الأَنْهَارُ ذَلِكَ الْفَوْزُ الْكَبِيرُ )

هنبدأ من اخر جملة واخر كلمة في الايتين وهي (ذلك الفوز الكبير )

وليه لم يقل ذلك الفوز العظيم؟

ده له علاقة بالقصة ..

ان القصة انتهت في السورة على هلاك المؤمنين بيد الظالمين وده يعتبر فوز للظالم .. لكن الانتقال بعد ذلك في سرد القصة الى احداث الاخرة في باقي السورة تفهم منه مقصد السورة وهو شمولية النظرة الى حقيقة الامر

وهو ان الدنيا دي مش اخر حاجة و ان فوز الظالمين ده فوز صغير مالوش لازمة .. لأن الدنيا دي عبارة عن جولة وان الموضوع لا ينتهي عندها ..انما لسه في كمالة تانية للاحداث عند ربنا في الاخرة .. فيها هيفوز المؤمنين على صبرهم بجنه دائمة ويبقى ده (الفوز الكبير ) في مقابل الفوز الصغير اللي حققه الظالمين في الدنيا المحدودة

يعني الظالم فاز فوز اولاني صغير والمؤمنين فازوا فوز في الجولة التانية فوز اكبر

دي الفكرة من القصة

انك تفهم ان الدنيا مش اخر حاجة لكن لسه فيه تكملة للاحداث بس مش هنا في الدنيا انما هي في الاخرة .. انك تشوف الموضوع بشمولية اكبر

وان يتصل فكر الانسان بالاخرة

عشان كدة السورة سردت ماحدث في الدنيا ثم ماحدث في الاخرة .. السورة هنا بتركز على موضوع ان فيه جولتين فيهم فوز وخسارة وان المؤمنين خسروا ارواحهم في الجولة الاولى لكن فازوا بالفوز الكبير في الاخرة

بينما الكافرين خسارتهم في اللاخرة ليس لها مثيل فهم في نار مستمرة لا تتوقف (النار ذات الوقود )

فهم اخذوا نصر صغير في دنيا منتهية لينتج عنه عذاب مستمر في نار لا تتوقف

لقد اقسم الله في بداية السورة على خسارتهم والوعيد الذي ينتظرهم ..

لقد اقسم لهم بعظائم الامور ليكون قسما مغلظا .. اقسم بالسماء التي جاء في وصف عظمتها في الاحاديث الكثير

واقسم لهم بما يناسب ما في السورة وهو اليوم الموعود ..

وشاهد ومشهود وهما لفظتان عن ان حدث يحدث مشهود عليه غير مجهول ..

فأين يذهبون؟

ثم جاء جواب القسم بعد ذلك ب (قُتل اصحاب الاخدود )

عارف لما نقول الفرق بين واحد خسر خسارة صغيرة .. جزء من فلوسة مثلا .. طيب لو خسر كل فلوسه تبقى خسارة اكبر ؟ طيب لو خسر فلوسه واولادة؟ تبقى خسارة اكبر واكبر .. طيب لو هو نفسة اتقتل؟

اتقتل دي يعني خسر فلوسة واولادة ونفسه ... يعني خسر كل شيئ .. ماهو الانسان ممكن يضحي بفلوسة واي حاجة بس يعيش .. حياته دي لو خسرها يبقى خسر كل حاجة ..

(قُتل ) دي كلمة بتتقال عن الخسران الكبير .. يعني دول كدة خسروا اكبر خسران وده يقابل الفوز الكبير اللي فازه المؤمنين.

وشوف تناسب كلمة وهو الغفور الودود في السورة مع قوله (ثم لم يتوبوا ) في شأن الذين فتنوا المؤمنين ..

عشان هو غفور ودود جعل لهم باب توبة مفتوح رغم بشاعة فعلهم

فالله لا يحب ان يعذب عبادة لكنه يغريهم بالتوبة ويعرض عليهم العودة اليه ومغفرة الذنوب .. لهذا تأتي بعدها انه ذو العرش المجيد .. والمجيد هذه قصة كبيرة تحتاج منشور كامل لشرحها لكنها باختصار من بلغ نهاية النهاية في الصفات الحميدة.